Khaamoshi achchi nahi inkaar hona chaahiyay
Yeh tamaasha ab sar-e-bazaar hona chaahiyay
Khaab ki ta'beer per israar hay jinko abhi
Pehlay unko khaab say baidaar hona chaahiyay
Ab wohi karnay lagay deedaar say aagay ki baat
Jo kabhi kahtay thay bus deedaar hona chaahiyay
Baat poori hay, adhoori chaahiyay a'e jaan-e-jaan
Kaam aasaan hay isay dushwaar hona chaahiyay
Dosti kay naam per kijiyay na kyun kar dushmani
Kuch na kuch aakHir tariq-e-kaar hona chaahiyay
Jhoot bola hay to kaayam bhi raho us per Zafar
Aadami ko saahib-e-kirdaar hona chaahiyay
Subscribe to:
Post Comments (Atom)
No comments:
Post a Comment